देश
असोज १८- सिरहा।
स्टार खबर।
सिरहाको कल्याणपुर नगरपालिका–८ अरङ गाउँमा विश्वकर्मा पूजाको आर्केस्ट्रा विवादपछि दलित बस्तीमाथि शुक्रबार दिउँसो सामूहिक आक्रमण भएको छ। ‘प्रहरी बोलाएको’ निहुँमा स्थानीय गैरदलित समूहले दलित समुदायका पाँच घरमा तोडफोड र लुटपाट गरेका छन्।
अरङको ठूलो पोखरीको उत्तरपट्टि डिलमा बसोबास गर्दै आएका दलित परिवारका घरहरूमा दिउँसो करिब २ बजेतिर प्रभास सिंह, नितेश सिंह, शैलेन्द्र सिंह, राजकुमार सिंह, मुस्तफा राइनलगायत २०–२५ जनाको समूहले आक्रमण गरेको पीडितहरूले बताएका छन्।
पीडित सोभित पासमानका अनुसार उक्त समूहले घर तोडफोड गर्दै घरभित्र रहेका सामान, सुनचाँदीका गहना र नगद लुटेका थिए। “शान्ति सुरक्षाका लागि कल्याणपुरबाट प्रहरी बोलाएका थियौँ, तर ईलाका प्रहरी कार्यलय कल्याणपुरका इन्चार्ज संजय शर्माकै अगाडि तोडफोड र लुटपाट भयो,” उनले बताए।
त्यस्तै, अशोक पासमानले चार आना सुन र ३० तोला चाँदीका गहना लुटिएको बताएका छन्। राजकुमार पासमानको घरबाट मजदुरी गरेर राखेको धान–चामल, दाल, १८ हजार रुपैयाँ नगद, चार आना सुन र १० तोला चाँदीका गहना समेत लुटिएको पीडित रासलाल पासमानले बताए।
उक्त समूहले बिन्दे पासमानको घरमा रहेका २० तोला चाँदीका गहना, दुई आना सुन र तीन हजार रुपैयाँ नगद लुटेको र घरका अन्य सामग्रीसमेत नष्ट गरेको जनाइएको छ।
गाउँमा घटनापछि आतंक फैलिएको छ। कल्याणपुरबाट पुगेका प्रहरी प्रभावकारी रूपमा सक्रिय नभएपछि मिर्चैयाबाट जनपद र सशस्त्र प्रहरी टोली पुग्दा मात्र आक्रमणकारीहरू फरार भएका थिए। प्रहरीले घटनामा संलग्न ६१ वर्षीय गणेश कामतीलाई नियन्त्रणमा लिएको छ भने बाँकी फरार व्यक्तिहरूको खोजी भइरहेको इलाका प्रहरी कार्यालय मिर्चैयाले जनाएको छ।
स्थानीयका अनुसार, “दशैंको बेला र भारी वर्षाको सम्भावनाबीच दलित बस्तीमाथि यसरी घर भत्काएर लुटपाट गर्नु जघन्य अपराध हो। राज्यका निकायहरूले तत्काल कारबाही र क्षतिपूर्ति सुनिश्चित गर्नुपर्छ।”
दलित बस्तीका घर भत्किएका कारण परिवारहरू ओत लाग्ने ठाउँविनै भएका छन्। पीडितहरूले स्थानीय सरकारसँग तत्काल अस्थायी बसोवासको व्यवस्था गर्न माग गरेका छन्।
