देश
कार्तिक २६- सिरहा।
स्टार खबर ।
सिरहा जिल्लामा पछिल्ला दिनमा बढ्दै गएको लागुऔषध कारोबार नियन्त्रणका लागि प्रहरीले सञ्चालन गरेको विशेष अभियानअन्तर्गत बिहीबार साँझ दुई छुट्टाछुट्टै स्थानबाट चार जनालाई लागुऔषधसहित पक्राउ गरिएको छ।
पहिलो घटनामा, जिल्ला सिरहा नगरपालिका–१ मा लागुऔषध बिक्री वितरण भईरहेको भन्ने गोप्य सूचनाको आधारमा लागुऔषध नियन्त्रण व्युरो गोलबजार, जिल्ला प्रहरी कार्यालय सिरहा र वडा प्रहरी कार्यालय सिरहाबाट खटिएको संयुक्त प्रहरी टोलीले सो स्थानमा छापा मारेको थियो।
जाँचका क्रममा स ११ च ५४८५ नम्बरको मोटरसाइकलमा सवार सिरहा नगरपालिका–१७ पटेरवा बस्ने २५ वर्षीय रामजिवन यादव र सोही स्थानका २७ वर्षीय दीपक कुमार यादवलाई पक्राउ गरिएको प्रहरीले जनाएको छ।
प्रहरीका अनुसार रामजिवन यादवको साथबाट ब्राउन सुगर जस्तो देखिने गिलो पदार्थ २४ ग्राम ८२० मिलिग्राम बरामद गरिएको छ। साथै उनीहरूका साथबाट मोबाइल फोन र मोटरसाइकल समेत बरामद गरिएको प्रहरीले जनाएको छ। दुवै जनालाई जिल्ला प्रहरी कार्यालय सिरहामा राखी थप अनुसन्धान भइरहेको छ।
त्यसैगरी दोस्रो घटनामा, नवराजपुर गाउँपालिका–५ स्थित कुसण्डी–जगतपुर सडकखण्डमा इलाका प्रहरी कार्यालय झाझपट्टीबाट खटिएको टोलीले भारतबाट नेपालतर्फ आउँदै गरेको स १० प ५३२६ नम्बरको मोटरसाइकल रोकी चेकजाँच गर्दा लागुऔषधसहित दुई युवक पक्राउ परेका छन्।
मोटरसाइकल चालक नवराजपुर गाउँपालिका–१ का २१ वर्षीय ऋषिकुमार यादवको साथबाट डाईजोपाम एम्पुल ५ थान, प्रोमेथाजाईन एम्पुल ५ थान र ब्रुफेनफाईन एम्पुल ५ थान फेला परेको छ।
त्यस्तै, सोही मोटरसाइकलको पछाडि सवार भगवानपुर गाउँपालिका–५ का १८ वर्षीय देवेन्द्र कुमार यादवको साथबाट डाईजोपाम एम्पुल १ थान र सिरिन्ज १ थान बरामद गरिएको प्रहरीले जनाएको छ।
पक्राउ परेका दुवै जनालाई मोटरसाइकलसहित नियन्त्रणमा लिएर इलाका प्रहरी कार्यालय महेशपुर पतार सिरहामा राखी थप अनुसन्धान भइरहेको प्रहरीले जनाएको छ।
प्रहरीका अनुसार पछिल्लो समय भारत सीमाबाट लागुऔषध चोरी पैठारी गरी सिरहा तथा आसपासका क्षेत्रमा बिक्री वितरण भइरहेको भन्दै कडाइका साथ निगरानी र धरपकड अभियान जारी राखिएको छ।
