सिरहा:विष्णुपुर गाउँपालिकाको आन्तरिक आम्दानीको ९६% प्रशासनिक खर्चमै, पारदर्शितामाथि प्रश्न

जेष्ठ -१० सिरहा।
स्टार खबर।

सिरहाको विष्णुपुर गाउँपालिकाले आन्तरिक आम्दानीको झण्डै ९६ प्रतिशत रकम प्रशासनिक तथा विविध शीर्षकमा खर्च गरेको खुलासा भएको छ। आर्थिक वर्ष २०८०/८१ मा गाउँपालिकाले आन्तरिक स्रोतबाट उठेको कुल रू. ३९ लाख ४० हजार ३१९ मध्ये रू. ३७ लाख ९१ हजार खाना, खाजा, चिया, पानी र कार्यक्रम सञ्चालन लगायत शीर्षकमा खर्च गरिएको पाइएको छ।

स्थानीय सरकार सञ्चालन ऐन, २०७४ को दफा ७१ र आर्थिक कार्यविधि तथा वित्तीय उत्तरदायित्व नियमावली, २०७७ को नियम ३९ अनुसार खर्च गर्दा सोको औचित्य, निर्णय र प्रमाणसहित कागजात राख्नुपर्ने व्यवस्था छ। तर गाउँपालिकाले अधिकांश खर्चमा बिल भर्पाई मात्र संलग्न गरेको र सम्बन्धित निर्णय तथा प्रमाण कागजात नजोडिएको पाइएको छ।

विशेषगरी “विविध खर्च” शीर्षकमा उल्लेखित बजेटमा खर्चको स्पष्ट उद्देश्य उल्लेख नगरी रकम खर्च गरिएकाले सार्वजनिक रकमको पारदर्शिता र जवाफदेहितामा गम्भीर प्रश्न उठेको सरोकारवालाहरूले बताएका छन्। आन्तरिक स्रोतको ४० प्रतिशतभन्दा बढी हिस्सा “विविध खर्च” मा गएकाले खर्चको औचित्य र आवश्यकतामाथि व्यापक शंका उत्पन्न भएको छ।

स्थानीय आर्थिक अनुशासनका दृष्टिले यो प्रवृत्तिले विकास योजना र नागरिक सेवाभन्दा बढी प्रशासनिक र आतिथ्य सत्कार खर्चमा प्राथमिकता दिएको देखिन्छ। सरोकारवालाहरूले खर्च पारदर्शी र औपचारिक कागजातसहित गर्ने अभ्यास अवलम्बन गर्न गाउँपालिकालाई आग्रह गरेका छन्।

सम्बन्धित खबर

सानाकिसान कृषि सहकारी संस्था बिष्णुपुर द्वारा निःशुल्क आँखा शिविर सञ्चालन हुँदै

प्रधानमन्त्रीलाई गाली गरेर कन्टेन्ट बनाएको आरोपमा युट्युबर पक्राउ

सार्वजनिक जग्गा र सडक अतिक्रमण हटाउन विष्णुपुर गाउँपालिकाको १५ दिने अल्टिमेटम