कर्जन्हा नगरसभाबाट समावेशी र उत्तरदायित्वमुखी विकास योजना सार्वजनिक, समुदायको सक्रिय सहभागिता

सिरहा, असार १०।
सोनु मिश्र ।

कर्जन्हा नगरपालिकाको १५ औँ नगरसभा समृद्धि, उत्तरदायित्व र पारदर्शिताको प्रतिबद्धतासहित सम्पन्न भएको छ।
मधेश प्रदेश सरकारका वन तथा वातावरण मन्त्री संजय कुमार यादवको प्रमुख आतिथ्यमा सम्पन्न उद्घाटन सत्रमा मन्त्री यादवले स्थानीय सरकारहरू समृद्ध मधेश निर्माणको मुख्य आधार भएको बताउँदै समावेशी र वातावरणमैत्री विकास योजनालाई प्राथमिकता दिन आग्रह गरे।

नगर प्रमुख भोला प्रसाद पोखरेलले अधिवेशनमा शिक्षा, स्वास्थ्य, खानेपानी, सडक पूर्वाधार, कृषि प्रवर्द्धन, स्वच्छता तथा सामाजिक सुरक्षाका क्षेत्रमा हालसम्मका उपलब्धि र आगामी वर्षका प्राथमिकता सार्वजनिक गरे। उनले समावेशी योजना निर्माण र कार्यान्वयनलाई उच्च प्राथमिकतामा राखिने बताए।

अधिवेशनमा महिला सदस्य, युवापुस्ताका प्रतिनिधि र प्रवासी श्रमिक सम्बन्धी सरोकारवालाहरूले महिला सशक्तिकरण, युवाका लागि सीपमूलक तालिम, रोजगारी सिर्जना, लघुवित्त पहुँच र प्रवासी समस्याको दीर्घकालीन समाधानको माग उठाए। नगर उपप्रमुखले यी विषयहरू नीति निर्माणमै समेटिने प्रतिबद्धता जनाइन्।

नगरसभामा वडास्तरीय प्रतिनिधि, सरोकारवाला संघ–संस्था तथा स्थानीय नागरिकको उल्लेखनीय उपस्थिति रहेको थियो। उनीहरूले विकास योजनामा पारदर्शिता, खर्च व्यवस्थापनको स्पष्टता, योजना अनुगमन प्रणाली मजबुत बनाउने र नागरिक सहभागिता सुनिश्चित गर्न माग गरे।

साथै, बजेटको प्रभावकारी उपयोग, गुणस्तरीय सेवा र कमजोर वर्गका लागि लक्षित कार्यक्रम सञ्चालन गर्नुपर्ने माग गरिएको थियो। नगरपालिकाले ती सुझावलाई आगामी नीति तथा कार्यक्रममा समावेश गर्दै कार्यान्वयनमा गम्भीरता देखाउने प्रतिबद्धता व्यक्त गरेको छ।

सम्बन्धित खबर

सानाकिसान कृषि सहकारी संस्था बिष्णुपुर द्वारा निःशुल्क आँखा शिविर सञ्चालन हुँदै

प्रधानमन्त्रीलाई गाली गरेर कन्टेन्ट बनाएको आरोपमा युट्युबर पक्राउ

सार्वजनिक जग्गा र सडक अतिक्रमण हटाउन विष्णुपुर गाउँपालिकाको १५ दिने अल्टिमेटम