सिरहा:विष्णुपुरको दुर्गा मन्दिरमा घटस्थापना सँगै सुरु भयो भव्य पूजापाठ

असोज-६ सिरहा।
सोनु मिश्र।

सिराहाको विष्णुपुर गाउँपालिका–१ स्थित रहेको दुर्गा मन्दिरमा आज बिहानैदेखि भक्तजनहरूको भीडले भरिएको छ। दशैंको पहिलो दिन घटस्थापनासँगै सुरु हुने पूजापाठले यहाँको वातावरणलाई धार्मिक र सांस्कृतिक उल्लासले रंग्याएको छ।

आजको दिन बिहानैदेखि टिका र कलश बोकेर हजारौं श्रद्धालु भक्तजनहरू दुर्गा मन्दिर परिसरमा पुगे। परम्पराअनुसार कलशसहितको परिक्रमा विष्णुपुर बजार हुँदै गाउँका गल्ली–गल्लीमा पुग्दा सम्पूर्ण बस्ती नै धार्मिक गीत, बाजागाजा र जयघोषले गुञ्जायमान बनेको थियो।

दशैंको समयमा हुने मुख्य आकर्षणमध्ये झिझिया नृत्य पनि यस वर्ष निरन्तरता पाउने भएको छ। प्रत्येक साँझ मन्दिर प्राङ्गणमा स्थानीय युवतीहरूले परम्परागत झिझियाको नृत्य प्रस्तुत गर्नेछन्। ढोल, मादल र झाँझको तालमा हुने यो प्रस्तुती धार्मिक आस्था मात्र नभई सांस्कृतिक संरक्षणको प्रतीक मानिन्छ।

दुर्गा मेला समितिका अध्यक्ष किसुनदेव यादव सचिब संजय कुमार मंडल उपाध्यक्ष मोहन ठाकुर
र स्थानीय व्यपारीहरुको सहयोगमा यस वर्षको तयारीलाई अझै व्यवस्थित र भव्य बनाउन स्थानीय स्तरमै व्यापक सहयोग जुटाएको बताएका छन्। उनका अनुसार सुरक्षादेखि व्यवस्थापनसम्म सबै पक्षलाई ध्यान दिइएको छ, जसले गर्दा भक्तजनलाई सहज वातावरणमा पूजा अर्चना गर्ने सुविधा हुनेछ।

स्थानीय बासिन्दाको विश्वास अनुसार, दशैंको पहिलो दिन दुर्गा मन्दिरमा पूजा गरेर वर्षभरि परिवारमा सुख–शान्ति, समृद्धि र आरोग्यता प्राप्त हुन्छ। यही विश्वासले गर्दा हरेक वर्ष यहाँ भक्तजनको भीड बाक्लो हुने गरेको छ। धार्मिक आस्थासँगै दशैंको मेलाले गाउँमा सामाजिक मेलमिलाप र एकता कायम गर्न पनि ठूलो योगदान दिने गरेको छ।

घटस्थापनासँगै सुरु भएको दुर्गा पूजाले विष्णुपुर मात्र नभई सिरहा जिल्ला लगायत हिन्दु धर्मावलम्बीहरु देश भरी नै आसपासका बस्तीलाई समेत उत्सवको माहोलमा ल्याइदिएको छ। आगामी दिनमा हुने झिझिया नृत्य, सांस्कृतिक प्रस्तुति र धार्मिक कार्यक्रमहरूले दशैंलाई अझ भव्य बनाउने अपेक्षा गरिएको छ।

सम्बन्धित खबर

सानाकिसान कृषि सहकारी संस्था बिष्णुपुर द्वारा निःशुल्क आँखा शिविर सञ्चालन हुँदै

प्रधानमन्त्रीलाई गाली गरेर कन्टेन्ट बनाएको आरोपमा युट्युबर पक्राउ

सार्वजनिक जग्गा र सडक अतिक्रमण हटाउन विष्णुपुर गाउँपालिकाको १५ दिने अल्टिमेटम