सिरहामा मनसुनजन्य विपद् पूर्वतयारी सम्बन्धी संयुक्त सुरक्षा अभ्यास सम्पन्न

जेठ २२ सिरहा।
सोनु मिश्र।

मनसुनजन्य विपद्का घटनामा प्रभावकारी प्रतिकार्य तथा उद्धार कार्यलाई थप व्यवस्थित बनाउन सिरहाको कर्जन्हा नगरपालिकामा संयुक्त सुरक्षा अभ्यास सम्पन्न गरिएको छ।

जिल्ला प्रशासन कार्यालय तथा जिल्ला विपद् व्यवस्थापन समिति, सिरहाको संयोजनमा कर्जन्हा नगरपालिकाको उत्तरायणी क्षेत्रमा उक्त अभ्यास सञ्चालन गरिएको हो। जिल्ला प्रमुख अधिकारी एवं जिल्ला विपद् व्यवस्थापन समितिका अध्यक्ष सुरेन्द्र पौडेलको अध्यक्षता तथा कर्जन्हा नगरपालिकाका उपप्रमुख लक्ष्मी कुमार श्रेष्ठको विशेष आतिथ्यमा कार्यक्रम सम्पन्न भएको थियो।

बिहान ९ बजेदेखि १०ः३० बजेसम्म सञ्चालन गरिएको अभ्यासमा मनसुनजन्य विपद्का बेला अपनाउनुपर्ने उद्धार तथा प्रतिकार्यका विभिन्न विधिहरूको प्रदर्शन गरिएको थियो। कार्यक्रममा बोट रेस्क्यु, अस्थायी उद्धार सामग्री (इम्प्रोभाइजेशन) निर्माण, हाईल्याण्ड रेस्क्यु, प्राथमिक उपचार तथा स्थानीय बासिन्दाको भूमिका र जिम्मेवारी सम्बन्धी व्यावहारिक अभ्यास गरिएको थियो।

अभ्यासमा नेपाली सेना, नेपाल प्रहरी, सशस्त्र प्रहरी बल, नेपाल रेडक्रस सोसाइटी, एनसीसीका विद्यार्थी, भूतपूर्व सैनिक, स्थानीय जनप्रतिनिधि तथा सर्वसाधारणको उल्लेख्य सहभागिता रहेको थियो। नेपाली सेनाका तर्फबाट सेनानी कैलाशकुमार बस्नेतको कमाण्डमा सुरक्षा टोली परिचालन गरिएको थियो।

कार्यक्रममा कर्जन्हा नगरपालिकाका सम्पूर्ण वडा अध्यक्षहरू, सुरक्षा निकायका प्रमुखहरू, रेडक्रसकर्मी, विद्यार्थी तथा स्थानीय बासिन्दासहित करिब २५० जनाको उपस्थिति रहेको थियो।

मनसुनको समयमा हुन सक्ने बाढी, डुबान तथा अन्य प्राकृतिक विपद्को सामना गर्न आवश्यक पूर्वतयारी, समन्वय र उद्धार क्षमताको विकास गर्ने उद्देश्यले आयोजना गरिएको उक्त संयुक्त सुरक्षा अभ्यास सफलतापूर्वक सम्पन्न भएको आयोजकले जनाएको छ।

सम्बन्धित खबर

चलिरहेको मोटरसाइकलमा उभिएर भिडियो खिच्दै सांसद बब्लु गुप्ता? भाइरल तस्बिरले उठायो ट्राफिक नियम पालनामाथि प्रश्न

५ लाख रुपैयाँ घुस लिँदै आन्तरिक राजस्व कार्यालय लहानका कर अधिकृत युवराज पाल अख्तियारको फन्दामा

सिरहामा कटुवा पेस्तोल र दुई राउन्ड गोलीसहित भारतीय नागरिक पक्राउ